១.ប្រវត្តិ
LAWYER ត្រូវបានបង្កើតឡើងក្នុងឆ្នាំ២០១៩ តាមរយៈវិញ្ញាបនបត្រចុះបញ្ជីការិយាល័យវិជ្ជាជីវៈមេធាវី លេខ ***** ចុះថ្ងៃទី១១ ខែកុម្ភៈ ឆ្នាំ២០១៩ របស់គណៈមេធាវីនៃព្រះរាជាណាចក្រកម្ពុជា ក្នុងទម្រង់ជា ការិយាល័យមេធាវី និងត្រូវបានបើកដំណើរការជាផ្លូវការ នៅថ្ងៃទី០៦ ខែមីនា ឆ្នាំ២០១៩ ដែលមានទីតាំងស្ថិតនៅក្នុងរាជធានីភ្នំពេញ។ LAWYER ត្រូវបានបង្កើតឡើង ដោយស្ថាបនិកតែម្នាក់គត់ គឺលោកមេធាវី ***** ដែលជាសមាជិកគណៈមេធាវី និង ជាសមាជិកក្រុមការងារស្រាវជ្រាវច្បាប់ និងពិគ្រោះយោបល់នៃក្រុមមេធាវីស្ម័គ្រចិត្តសម្ដេចតេជោសែន ទាំងជាមេធាវីប្រចាំកងរាជអាវុធហត្ថលើផ្ទៃប្រទេស។ជាការពិត LAWYER បានប្រមូលផ្តុំនូវធនធានមេធាវីជាច្រើន ដើម្បីពង្រីក និង បម្រើសេវាកម្មច្បាប់ដល់អថិជនតាមតម្រូវការ និងប្រកបដោយគុណភាពខ្ពស់បំផុត។
ក្នុងរយៈកាលកន្លងមកនេះ LAWYER បានខិតខំអភិវឌ្ឍខ្លួនជាបន្តបន្ទាប់រហូតក្លាយខ្លួនជាការិយាល័យមេធាវីមួយដែលមានការទទួលស្គាល់នៅក្នុងព្រះរាជាណាចក្រកម្ពុជា។ជាក់ស្ដែង តម្រាច្បាប់ ត្រូវបានផ្តល់ទំនុកចិត្តពីវិនិយោគិន និង ពាណិជ្ជករ ទាំងក្នុងស្រុក និងក្រៅស្រុក ក៏ដូចជាអតិថិជនជាបុគ្គលឯកជនផ្សេងទៀត ដែលស្វែងរកជំនួយផ្នែកច្បាប់។ មេធាវី ទីប្រឹក្សាច្បាប់ និងបុគ្គលិក របស់ LAWYER បានទទួលការបណ្តុះបណ្តាលផ្នែកច្បាប់ យ៉ាងទូលំទូលាយ ទាំងការសិក្សានៅក្នុងប្រទេស និងក្រៅប្រទេស លើវិធានច្បាប់ជាតិ និងអន្តរជាតិ។
ការអភិវឌ្ឍខ្លួនដ៏ឆាប់រហ័សរបស់ តម្រាច្បាប់ នៅក្នុងរយៈពេលដ៏ខ្លីរួមទាំងមានការគាំទ្រដ៏ច្រើនលើសលុបពីអតិថិជន និង មជ្ឈដ្ឋានផ្សេងៗទៀត LAWYER បានវិវត្តន៍ខ្លួនទៅជាក្រុមហ៊ុនមេធាវីមួយ ដែលមានស្តង់ដារ ជំនាញ និង មានវិជ្ជាជីវៈខ្ពស់ ដូចមានក្នុងវិញ្ញាបនបត្រចុះបញ្ជីការិយាល័យវិជ្ជាជីវៈមេធាវី លេខ ***** ចុះថ្ងៃទី០១ ខែធ្នូ ឆ្នាំ២០២០ របស់គណៈមេធាវីនៃព្រះរាជាណាចក្រកម្ពុជា ក្នុងទម្រង់ជា ក្រុមហ៊ុនមេធាវី។ ជាការពិត ក្រុមហ៊ុន LAWYER មានមេធាវីកំពុងប្រកបវិជ្ជាជីវៈ ពោរពេញទៅដោយសមត្ថភាព ចំណេះដឹង បទពិសោធន៍ ក្នុងវិស័យពាណិជ្ជកម្ម រដ្ឋប្បវេណី ព្រហ្មទណ្ឌ ការងារ និងវិស័យផ្សេងៗទៀតជាច្រើន។
២.គោលដៅ និងចក្ខុវិស័យ
- ជួយ និងការពារផលប្រយោជន៍ស្របច្បាប់របស់អតិថិជន ប្រកបដោយប្រសិទ្ធភាព និងមានគុណភាពខ្ពស់ ក្នុងគ្រប់ករណី និងគ្រប់ពេលវេលា ។
- ពង្រឹងការអនុវត្តក្រមសីលធម៌វិជ្ជាជីវៈ ក្នុងប្រតិបត្តិការផ្តល់សេវាកម្មច្បាប់ ។
- សហការជាមួយអង្គការ ស្ថាប័នរដ្ឋ និងឯកជន ដែលពាក់ព័ន្ធ ដើម្បីជម្រុញ និងលើកស្ទួយការយល់ដឹងផ្នែកច្បាប់ឱ្យបានទូលំទូលាយ នៅក្នុងប្រទេសកម្ពុជា និងសកម្មភាពស្របច្បាប់ដ៏ទៃទៀត ដែលបម្រើឱ្យការសិក្សាអប់រំផ្នែកច្បាប់ ។
- ប្រមូលផ្ដុំអ្នកច្បាប់ជាតិ ឬ អន្តរជាតិ ដែលមានសមត្ថភាព ក្នុងគោលបំណងចង់អភិវឌ្ឍ ឬ សហប្រតិបត្តិការ ដើម្បីអភិវឌ្ឍវិស័យច្បាប់នៅកម្ពុជា ។
- ពង្រឹងវិជ្ជាជីវៈមេធាវីនៅប្រទេសកម្ពុជាឱ្យមានលក្ខណៈស្តង់ដារក្នុងការផ្តល់សេវាច្បាប់ និងសេវាបន្ទាប់បន្សំពាក់ព័ន្ធប្រកបដោយគុណភាពខ្ពស់ រួមទាំងមានការទទួលស្គាល់ទាំងក្នុង និងក្រៅប្រទេស ក្នុងក្របខណ្ឌនៃក្រមសីលធម៌វិជ្ជាជីវៈ ។
- ចូលរួមសកម្មភាពមនុស្សធម៌ តាមរយៈការចូលរួមផ្តល់ជាជំនួយផ្នែកច្បាប់ ទៅកាន់ប្រជាពលរដ្ឋ ដែលមានជីវភាពក្រីក្រ ដោយឥតគិតថ្លៃ នៅក្នុងការការពារសិទ្ធិ និងផលប្រយោជន៍របស់ខ្លួន ។
៣.គោលការណ៍នៅក្នុងការប្រកបវិជ្ជាជីវៈ
- មានទំនួសខុសត្រូវខ្ពស់ចំពោះការងារ និងបំពេញការងារដោយយកចិត្តទុកដាក់បំផុត ។
- ប្រកាន់ខ្ជាប់នូវគោលការណ៍សុចរិតភាព និងភាពស្មោះត្រង់ ហើយអនុវត្តការងារប្រកបដោយ
ឯករាជ្យភាព មានគុណភាព ប្រសិទ្ធភាពដើម្បីរក្សាតម្លៃវិជ្ជាជីវៈរបស់ខ្លួន ។
- បំពេញការងារស្របតាមវិជ្ជាជីវៈមេធាវីនៃព្រះរាជណាចក្រកម្ពុជា ។
- ធានានូវផលប្រយោជន៍របស់អតិថិជនជាអាទិភាពក្នុងពេលអនុវត្តការងារ ទាំងក្របខណ្ឌច្បាប់ជាតិ និង អន្តរជាតិ ។
- ធានារក្សាការសម្ងាត់ និងភាពឯកជនរបស់អតិថិជនយ៉ាងម៉ឺងម៉ាត់ ។
- ផ្តល់តម្លៃឱ្យអតិថិជនទាំងអស់ស្មើៗគ្នា មិនថាជាអតិថិជនថ្មី ឬ ជាអតិថិជនចាស់នោះឡើយ ។
- អនុវត្តការងាររបស់ខ្លួនដោយគោរពតាមការព្រមព្រៀងជាមួយអតិថិជន និង មិនបំពានសិទ្ធិសម្រេចរបស់អតិថិជននោះទេ ។
- ធ្វើការប្រឹក្សាជាមួយអតិថិជនមុននឹងអនុវត្តការងារ ឬ ដោះស្រាយបញ្ហាពាក់ព័ន្ធ ។
- អនុវត្តការងារឱ្យអស់ពីសមត្ថភាព និង លទ្ធភាពដែលមាន ដោយឆាប់រហ័ស ប្រកបដោយមានប្រសិទ្ធភាព ។
- គោរពនូវការសម្រេចចិត្តរបស់អតិថិជនទាំងអស់ និង មិនលាក់កំបាំងព័ត៌មានអំពីការអនុវត្តការងារ ឬ លទ្ធផលដែលសម្រេចបាននោះទេ ។
៤.ការប្តេជ្ញាចិត្ត
ក្នុងការផ្តល់សេវាកម្មរបស់ក្រុមការងារតម្រាច្បាប់ គឺមានការប្តេជ្ញាដូចខាងក្រោម:
- ផ្តល់ជូននូវសេវាកម្ម ដែលមានគុណភាពល្អបំផុតដល់អតិថិជនទាំងអស់ ទាំងនៅក្នុងប្រទេស និងក្រៅប្រទេស ។
- ខិតខំសម្រេចលទ្ធផលឱ្យបានលើសពីការរំពឹងទុករបស់អតិថិជន។
- ស្វែងរកជម្រើសល្អបំផុត សម្រាប់ផ្តល់ផលប្រយោជន៍ដល់អតិថិជនក្នុងការបង្កើន និងអភិវឌ្ឍលើអាជីវកម្មរបស់អតិថិជន ។
- ព្យាយាមអនុវត្តការងារឱ្យបានល្អបំផុត ដើម្បីឱ្យមានការទទួលស្គាល់ពីគុណភាពការងារ និងស្ដង់ដារការងាររបស់តម្រាច្បាប់ពីស្ថាប័នដែលពាក់ព័ន្ធជាមួយ ។
- ផ្តល់ជូនអតិថិជនរបស់តម្រាច្បាប់នូវសេវាកម្មផ្នែកច្បាប់ ដោយមានការទទួលស្គាល់ជាអន្តរជាតិ។
- ធ្វើការបកស្រាយឱ្យច្បាស់លាស់អំពីច្បាប់ពាក់ព័ន្ធ និងជម្រើសនៃនីតិវិធី សម្រាប់ការដោះស្រាយវិវាទឱ្យអតិថិជនបានដឹង ។
- ធ្វើការវាយតម្លៃនូវវិធីដោះស្រាយនីមួយៗ ដើម្បីស្វែងរកនូវជម្រើសដ៏ល្អបំផុត សម្រាប់អតិថិជន និងវិភាគអំពីលទ្ធផលវិជ្ជមាន និង អវិជ្ជមាននៃជម្រើសទាំងនោះ ក្នុងលក្ខណៈយុត្តិធម៌ និងសមហេតុផល ។
- បង្កើនសក្តានុពល និង សមត្ថភាពរបស់តម្រាច្បាប់ ដើម្បីបំពេញតម្រូវការបច្ចុប្បន្នរបស់អតិថិជន ដែលមានស្រាប់ និង ការរំពឹងទុកពីតម្រូវការនាពេលអនាគតរបស់អតិថិជន ។
